تحت الزليز - شيماء البيزاني
قتلي الضربة الي ماتقتلكش تقويك؟
نيتشه ماحلش عينيه بيناتنا...ينظر كيفما يحب.
يجي يجربها العيشة هوني قبل!
شمعنتها تنظر عليا كيفاش نعيش؟...و أنا وين نقبل نراها باركة.
تحشي فيه!
تقلقت؟
قتلك ما تنجمش العيشة هوني.
احسب روحك كيف بديت.
2-
تجيوا بش تروحوا بتصاور...بش تاخذو حكاياتنا.
تقولش عليها عيشتنا قراطس قلوب...
مصوارها قهوة...تلم الي كتب نصوص و تقارير...وتروح.
وبعد؟
شنوة ربحت منك كان الريق الشايح و المواجع المتحيرة؟
تقولش انت تربينا؟!
3-
<متحكش فينا السبة>
خليناهالكم البلايك...
شمعنتها انت طبيب و تخاف مني كي نجيك؟
شمعنتها الأستاذ يعطيني عشرتي بركة ما نعتبهاش؟
احنا مرضنا و داوينا رواحنا... احنا تعلمنا و علمنا عليها...
بلها و اشرب ماها.
4-
انت الي النوم تخيط بيه الأيام؟
انت الي تخبي روحك تحت المخدة بالكشي الدنيا تنساك؟
انت الي دينارين تبني بيهم أحلام؟
انت الي تهز راسك رقبتك توجعك؟
انت الي ضحكت عليك صاحبتك كي بديت تحكي على مستقبلكم؟
انت الي الناس تقحرلك وقبل ما تحل فمك يقولولك : مافماش!
5-
انا الي ديما يسألوني شنعمل هوني.
انا الي نعرف روحي غلطة في وقت غالط.
شنوة نحب؟
نحب بلاصتك. ونحبك في بلاصتي!
وقتها بركة تفهم.
<عندي حاجة كي الكوبة في قلبي ما تتحلش>
6-
مايكبر في عيني حد.
على قد غصتها...على قد هزانها و سبطانها... منغفرش و مانرشفهاش.
مبادئكم ما تعنينيش و كلامكم مايروقليش.
وقتلي نراها تسري قبل الشمس.
وقتلي نراها نفس القماشة في البرد و الدفاء.
وقتلي نشوف عينيها خايفة من باكو الدواء.
نبزق عليكم الكل.
7-
الكلها وجهات نظر.
انت تراه خمج. انا نراه حالة عادية.
انت السرقة تراها جريمة. انا نشوفها أسلوب حياة.
علاه؟ قلقتك العجلة مقلعة؟
وقتلي يقلقوك الاخرين...كل واحد يأخذ حقه.
في الحرب كل شيء متاح. و الحقيقة اول حاجة تضيع.
الكلها وجهات نظر.
8-
سامحنا خاطر كي الشقف غرق, قلقناكم في كيوفكم.
سامحنا كي مالقيناش وين نسرحو ساقينا, عملنا دلواشة في حومكم النظيفة.
سامحنا عاد! كي نجحنا و ولينا ببلايصنا من غير واسطة.
ساعات نجي نحط روحي في بلاصتك...
اما مانيش بنت قح صرف.
9-
العبث كي تجي العين في العين و تحسب روحك ما ريتنيش.
العبث كي تتبكى و تتشكى من العيشة الكلبة في لايف بتليفون يخيلصلي كراء عشرة شهر القدام.
العبث كي الحوكمة الرشيدة تكتبو عليها الف تقرير و باقي الماء مقصوص عنا.
العبث كي تحكي عليا و غايضك حالي, و انت تبدل المادة كي نعرضك.
10-
كيفي كيفك...الكلنا كذابة...و الكلنا عياشة.
اغنى واحد فينا مايوصلهاش عيشة الملوك.
هي كايت و تلبس من زارا.
مانموتش بغصتي.و مانعيشش بحمصتي.
نلبس و نزين و نتعشى في الكليف.
وغدوة نخرج من هوني.و نطلع!
الحكاية بكلها واقفة على برشة فلوس...بااااارشة فلوس.
11-
كي تطيح, موش القاع الي يلمك.
تحت الزليز ناس من كل بر.
حكاياتهم تكبار...تصغار...تتشابه.
ظالم و مظلوم و ساعات الزوز.
نضحك و انا على الجمر.
ريتها الدنيا من الفوق و بعد حطتني في قلبه...
لازم ترجع الدنيا تضحكلي...
12-
كلمة لا ما تجيب بلاء؟
ههههههه
كل كلمة بحسابها...و اذا لصقت فيه الحيط؟
كي ييحلو عليك الكتاب...تاكل الي كتبوهولك.
لا...موش انا الي بعت. اما هوما هانت عليهم.
لا...موش انا الي رضخت. اما هوما خلاوها بينا.
لا...موش انا كليت عرقك. اما هوما تعشاوا بينا و تسحروا بيها.
13-
لحظة ظهور المسدس في الحكاية, لازم طلق النار....
مانيش مسامحة...ولا عمري بش نجم نسامح.
حاولت... سكرت عينيا, تخنقت بروايح الزبل.
خيطت فمي...وذنيا كلاتهم أصوات الصياح و النباح في سبيطارات تونس... دواميس الروح.
بقى كان الهروب...و نويتها الهجة.
اما بقالي ثار... دين في رقبتي...وصية تكتبت بالعينين.
الدنيا قفل؟...أحنا المفاتح!
قهرتني...ذليتني من غير ما نراك و لا تعرفني...
اما وين مشيت...وين نقبل...المصيبة الي تصخطني كل مرة وراها تصحاحتك...
الموت امنية رحيمة...نحب اكثر! نحب نقتلك...نغرس فيك ظوافري و سناني! نوجعك...نوووووجعك. وشوية فيك.
الفلوس في السلطة... و السلطة في الفلوس...وانت الزوز...
انت الداء و بغيابك الدواء.
انت القنطرة الي بيننا و بينهم...
اذا تكسرت, الوقت يجي معانا...و الأوراق تتمشكى من الأول و جديد....
الموت ماهو كان دقة اذا غابت...الحكاية الكل مرهونة في دقة....
Comments
Post a Comment