المسرحية: ملف666... شيماء البيزاني

 

المسرحية: ملف666...

شيماء البيزاني

 

 

المشهد1

(المكان: تحت الشجرة

 

طاولة و ستة من الناس راقدين... ريوسهم على الطاولة... يقوموا فرد وقت ببطئ....)

شخص1: شنوة؟ مزلنا؟

شخص2: يبدو أنه ماتبدل حتى شيئ.

شخص3: نعاوده. من الأول و جديد.

شخص4: أكهو... قعدنا كان نهزه و نسبطه !

شخص5:

Je regrette ! Je ne me suis pas engagée pour ça !

شخص 6: ما عنا حتى حل اخر كان نمشكيوا كل شيء و نعاوده.

(يمشكيو فوق الطاولة بطريقة ايقاعية و حركات تتعاود في الهواء... بدون ان يلمسوا فعليا الملفات الموضوعة امامهم....)

 

شخص1: الماف 666

الكل: أوووووووه!

شخص2: مثقله ها الدوسي!

شخص3: نعاوده من الأول و جديد.

شخص4: فاش تعاود؟! هو نفس الملف من أول ما بدينا.

شخص5:

Je regrette !

اما بش نباتو ما نصبحو فيه!

شخص6: ما عنا حتى حل كان نعاودوه... من الأول وجديد....

 

(يأخذ كل واحد فيهم نسخته من الملف الي مقابلته و يحطها قدامه. و يحلوه الملف فرد وقت.)

 

شخص1: زعمة كان نقراووه من الاخر موش خير؟

الكل: عملناها. مافادش!

شخص2: و كان نقلبوه؟

الكل: مفادش.

شخص3: و كان نحرقوه؟

الكل: ما يتحرقش!

شخص4: كان نفشله المرة هذه. بش ترصيلنا في مرة أخرى.

 

 

شخص5:

 

Je regrette ! Mais c’est la même merde qui se répète !

شخص6: فمة حل واحد بقالنا.

 

(يتلفتو الناس الكل للشخص6 )

 

شخص6: نبدله الملفات بين بعضنا.

 

(الوجوه تتقلب... يتنفضوا من بقايعهم كانه لبسهم جن... كل واحد شادد الملف كانه روحه فيه... يترددوا...لكن اليأس حكم فيهم.

يبدلوا الملفات بين بعضهم. يحلوا. و يصابون بالذهول لهول ما يرونه.)

 

شخص1: (بعد ما خذا ملف شخص5) هذاكة علاه يا زميلة دخلت بعضك كي غلطت المرة الي فاتت و حليت الملف متاعك؟

شخص5:

Je regrette !

اما مانيش فاهمة شتقصد!

شخص2: كان بش نبداوها بالتلميحات... من توة نقلكم نعاوده مرة أخرى!

(صمت)

شخص3: الكلنا في الهواء سوى يا زملاء... ماهيش صدفة.

شخص4: جاء الوقت الي نكشفو فيه كوارطنا. بالكشي هذا شنوة يحبوا....

(يخزروا في الاتجاهات الكل)

شخص6: مبقالناش برشة وقت علو المرة الجاية. الحساب بعد القضاء بدعة.

الكل: (يضحكوا بعصبية) امالا فاش قاعدين نعملوا احنا توة؟

 

.......................................................نهاية المشهد.......................................

 

 

 

 

 

المشهد2:

شخص7: تفضل. تفضل ارتاح.

شخص8: (يتقدم و يقعد)

شخص7: شنوة نشربوك؟

شخص8: (ساكت)

شخص7: المرة هذه لازم نتفاهمو!

شخص8: (يخزرله باشمئزاز)

شخص7: خزرتك تطلعلي الكلبة بنت الكلب!

شخص8: (يتبسم)

شخص7: المرة هذه موش كي كل مرة! المرة هذه بش نفضوها !

شخص8: فات الفوت.

شخص7: ما فمة حد قعد في البلاصة الي انت قاعد فيها الا و رضخ! كل واحد و سومه. كل واحد و نقطة ضعفه.

شخص8: الحكاية موش متاعك. الحديث موش معاك...

شخص7: هوما وكلوني نتلهى بيك! هوما وصاوني نلقى حل معاك. الي يخون الوصية عندهم...(يتفاجئ بروحه يده اليمين على رقبته)

شخص8: ما قالك حد تعامل معاهم.

شخص7: مكانش عندي حل... معنديش!

شخص8: الحل ديما موجود... قول خفت. نتفهمك.... قول ضعفت. نفهمك.... قول طمعت.نسمعك. أما بش تكذب عيني في عينك؟! لا!

شخص7: نكرهك... خاطر كل ما نراك نتذكر الي فمة شكون قال لا. كي نشوفك كل صباح, نتذكر كذبي الي عايش نصدق فيه بش نغم على الوسخ و العفن الي لاصقني... هذاكة علاه البلاصة هذه ما تززيناش الزوز.

شخص8: حتى لو مشيت و غبرت... قاعد طابع في مخك... تنجم تنسى الكل حتى اسمك... اما انا... انا حاجة ما تموتش.

شخص7: لا! لا! لا! (يبكي بطريقة هستيرية) باهي افهمني! اعذرني . سامحني علي عملته و الي بش نعمله فيك.

شخص8: الحكاية مهيش في شخصك و لا عمرها كانت. انا. نهارة الي نبعد, ننساك في درج و نرتاح. اما انت... حالك يسخف.

شخص7: (الشر يتطاير من عينيه) هذاكة علاه بش نخليك معلق كيفي! مرهون في تركينة! لا تعرف روحك هوني لا غادي...قاعد و الا ماشي... حر و الا عبد... حتى لين تجيني تحبي بش نفرج عليك!

شخص8: صار مزلت ناوي تعاود من الأول و جديد؟

شخص7: قول الي موش انا صححت!

شخص8: لا.

شخص7: قول موش انا ردمت السم في الأرض!

شخص8: والي داير بينا هذا منين جاء؟ الدواء المضروب الي رحل النخل... الزبلة الي مردومة في قفصة و مطيشة في برط قليبية؟...

شخص7: قول الي راجل انتحر!

شخص8: لا! احنا ما نحملوهش. (يقصد الي ليسوا بحاملي الأسلحة العمداء الي في الديوانة)

شخص7: قول البرط ما تعدى فيه حتى مخارقات للقانون.

شخص8: (يضحك) هكة توة بش نعلمك في اختصاصك؟

شخص7: قول الي نحنا نخدمه بنظافة و ناس ملاح.

شخص8: اخيب منكم ما تلقاش.

شخص7: (يصيح)

شخص8: (يضحك) تعبت؟ نعاودوها؟

.....................................................نهاية المشهد.........................................................

 

 

 

 

 

 

 

 

 

 

 

 

 

 

 

 

 

 

 

 

 

 

 

 

المشهد3: ( شخصيتين مهرجتين بعض الشيئ... تمثل التناقض  الذي نلتمسه حتى في امثلتنا الشعبية التونسية....)

شخص9: موش كل مرة تسلم الجرة.

شخص10: أنا قتلك الثالثة ثابتة.

شخص9: يا ولدي اسمع كلام الي يبكيك و ما تسمعش كلام الي يضحكك.

شخص10: الي مكتوب على الجبين لازم تراه العين. والي في قدري يجيبه المغرف.

شخص9: بوس الكلب من فمه حتى تقضي حاجتك منه. و كان لازم ناديه سيدي.

شخص10: الكلب كلب و كان يغطسوه في الذهب.

شخص9: الي خاف نجى!

شخص10: بوسعدية خايف من الكلب و الكلب خايف من بوسعدية.

شخص9: ما تعملشي كيف الي عايش يتمنى في عنبة. مات. جابوله عنقود.

شخص10: الي خلق ما يضيع. و ربي الي عطاك يعرف باب دارنا.

شخص9: النجار باب داره مخلوع!

شخص10: ربي موجود على عباده يجود. و الباي باي حتى في شكارة.

شخص9: مايغلب السارق كان القطعي.

شخص10: اذا عييت, احسب روحك كيف بديت.

شخص9: الفم ما يقول لا. و القضية ما تتقضى.

الزوز: اشرب و الا طير قرنك!

..................................................نهاية المشهد.................................

 

 

 

 

 

 

 

 

 

 

 

 

 

 

 

المشهد4: المخبر و عرفه

شخص11: سيدي! سيدي عرفي!

شخص12: اه نعم! علاه قصيت عليا و جايبني هنا! كان يطلع الخبر كيف وجهك كيما كل مرة. الا ما!...

شخص11: لا سيدي و الله لا! هذا خبر غير!

شخص12: انطق ! ما تعطلنيش!

شخص11: ايجا منا سيدي عرفي. لتوخي الحذر. كان يسمعونا تنجم تقوم قايمة في البلاد!

شخص12: لها الدرجة؟

شخص11: و اكثر! الخبر من الحدة و الخطورة الي ... ينجمو...ينجمو...ينجموا يبنيولنا صنبة كبيرة في الأفيني!!!

شخص12: يزي يا راجل! هكة تزيد فيه.

شخص11: و الله سيدي الخبر يوصل يرقيني!... أنا و اياك.

شخص12: برة عاد!... هاو رجعلي لحكاية الترقية. يا ولدي راك صباب! معناها صباب ماء على اليدين! ما نصبولهمش شهرية الصبابة. على قد الصبة تقبض. فريلانسر معناها. هيا تكلم عاد!

شخص11: ايجا اقرب شوية سيدي خلي نحكي معاك.

شخص12: اكثر من هكة هيبة السلك تطيح!

شخص11: غدوة مع ماضي ساعة متاع اليل بش يخرجوا في كونطنير صفراء و يبداوا رحلتهم وقت وصول القمر المكتمل في نصف السماء. و هضاكة هو!

شخص12: شنوة هذاكة هو؟! ماكثر ربي كان الكونطنيرات . علاش مالا برط؟!

شخص11: اما هاذي صفراء الي نحكيوا عليها هوما في وسطها.

شخص12: كونطنير...

شخص11: صفراء سيدي...

شخص12: كبيرة و الا صغيرة؟

شخص11:

لاهي لاهي...من البعيد تظهر صغيرة. و من القريب تولي كبيرة.

شخص12: صفراء كركم و الا صفراء بطيخ؟

شخص11: تحت الشمس صفراء فاقعة (بالعربية الفصحى)...تي تقولش صالصة متع المصلي.. و كي يطيح الليل, تولي ما تتشافش من البعيد. أما! كي تقربلها تلقاها باهتة. و مع المغرب سيدي! يولي لونها بني خراوي . حشاك.

شخص12: و قتلي هوما الكل فيها؟

شخص11: أي سيدي.

شخص12: هذا مايمنعش الي لازم نتروجلو معاهم و نخرجوهم.

شخص11: نعم؟ مفهمتش سيدي.

شخص12: الكونطنير متاعهم و يحشيوا فيها الي يحبو.

شخص11: موش وصيتني سيدي بش نعس عليهم حتى لين تأخذ حقك منهم؟ سامحتهم؟ بش تخليهم يقطعوا من غير ما يخلصوك؟

شخص12: المسامح كريم.

شخص11: في التلفزة كونشي...

شخص12: احترم نفسك! ما تنساش روحك!

شخص11: يا سيدي راهم متحلفين يوصلو غادي و يفضحوك! هازين معاهم تسجيلات تبعثك ورا الشمس..

شخص12: سكر فمك! ما ولدتوش امه الي بش يبعثني وراء زحل! برة عيش ولدي. شد هاك على قد صبتك 20 دينار.

(يخرج شخص11)

شخص12( يتكلم في الجوال): ألو... كونطنير صفراء ...رصيف666. سيب الغاز و ارميهم في البحر. و ماتنساش قيدها خرجت في بابور نصف الليل. التقرير؟ اكتب فيه كمشة همال تحت السن القانوني. التهمة: حراقة.

...............................................................نهاية المشهد..............................................................

 

 

 

 

 

 

 

 

 

 

 

 

 

 

 

 

 

 

 

 

 

 

 

المشهد 5: سميرة و وزيرة التجهيز و الإسكان

شخص13: حضرة الوزيرة! نهاركم اسعد الأيام. تهنى مدامني صبحت عليك جوك فسفس. و هذا بوكي نوار مني و من نساء الحي. ربي يفوحها عليك! و يطوللنا في عمرك. خوذ. فاوح.

(الوزيرة ما تاخذوش)

شخص14: سامحني. شكونك؟ تابعة جماعة الكاميرا الخفية؟ ممنوع التصوير هوني!

شخص13: يعطيك حجة مدام الوزيرة. كيما كل مرة تحب تنكت؟ هههه فدلاكجية مشاء الله. تبارك الله. يرحم من قرا و ورى. انا بابا خرجني من السيزيام. و الا راني توة...

شخص14: تفضل شكونك؟ علاش قاعدة قدام باب الوزارة؟

شخص13: اييه كان الباب جاء يتكلم... عندي مدة و انا قدام الباب نستنى فيك. و كيما قالولي نساء الحومة: لازم يجي نهار و الوزيرة تجي. و هاك جيت. و الله فريمون يعطيك الصحة. جاية تسري في الصباح. ياسر عليك! ربي ينصرك على هم الزمان و على مين يعاديك!

شخص14: شنوة اسمك؟

شخص13: سميرة

شخص14: سميرة شنوة

شخص13: ملي نعقل ينادولي سميرة بنت الحوات.

شخص14: تسكن قريب سميرة؟

شخص13: لا بعيد

شخص14: منين جاية؟ من غادي؟

شخص13: ابعد من غادي

شخص14: بعد غادي فمة السبخة

شخص13: انا وراها.

شخص14: تسكن وراء السبخة؟

شخص13: لا لا. حومة وراء السبخة جوها باهي. اما حومتي برج الشايح هي الي تتشكى لربي.

شخص14: اه. لا هوني نقلك تغلط. و انا شنعمل هوني؟ شكارة سيمان قدامك؟ حومتك حكينا فيه موضوعها و فضيناها. مشكلتكم قريب قريب تتحل. و نزيدك زيادة حومتكم ولى اسمها برج الماء. حتى نبعده علاها العكس و نجلبه الطاقة الإيجابية.

Positive vibes. Only positive vibes Mme.

شخص13: شنية تجي هذه بالعربي مدام الوزيرة؟

شخص14: الطاقة الإيجابية

شخص13: دوحي! الضوء مقصوص و هي تحكيلي على الطاقة! يا مدام رانا معادش نتنفسوا من الروايح و الحرايق. السل عاود رجع. خشوماتنا معادش تفرق بين الهواء و الاخر. ديارنا في الحومة قريب تتغم بالمصب. حتى الجرابع هجت! وتقولش الهم موش راضي بينا تزيدو تبعثولنا قرار هدم! ناقصنا رجالنا في خدمة التبربيش في المصب الي خسر يد و الي خسر ساق في جرة دقة متاع زريقة. ناقصنا تقوموا تطردونا.

شخص14: تي ماهو الحومة تشرات من مستثمر عربي تابع المملكة  و كذا. و بش يتلهى بيكم مليح مليح. احنا توة خرجنا من الموضوع.

شخص13: هكة يا مدام! جمعتين ندادي بالبوكيه نوار.ريقي شاح! خالتي فطيمة دارها بركة فيها خيط ضوء و فريجيدان. خليناها تنحي ثومها و بصلها و مرقها و عجتها بش نخبيوا البوكيه في البرود بش ما يذبالش و ما ينتانش جرة المصب الي نحنا فيه. جملنا حقه نساء الحومة كان بالجاه و الجابيه...100فرنك على 100 فرنك. اول مرة يدخل بوكيه نوار للحومة! و الرجال سكرنا عليهم الجامع. قلنالهم ماتخرجوا كان ما تختمو 66 حزب حتى لين البركة تهبط و نشوفه الوزيرة. و في الاخر تقلي ولينا تابعين مملكة ؟! هيا يكثر خيرك ! شنوة بش نقول لنساء الحومة؟! و خالتي فطيمة ؟ و الرجال؟ و الحاكم الي متحلف فينا بعد ما طردناهم البارح مع رئيس البلدية و طرشنا عليهم الحجر و الماء! لا و نصيحوا زادة : مناش مصب! مناش مصب! الحديث مع اسيادك!

نساء مكبرين ريوسنا باختنا و زميلتنا في الكفاح.

شخص14: انا؟! كيفكم؟!

شخص13: حتى احنا نخدمه كيفك و اكثر! نسرحه القمم و نردمه الحفر و نوقفه السور المعوج و نلمه و نبنيوا و نصلحوا!

شخص14: لا هاذي قالتلهم و اسكتوا ! هذا تطيح قدر! هزوها عليا!

(يجيوا زوز يكركروا سميرة)

شخص13: شد النوار! ما عندي وين نحطه! لازم تجي مرة ونحلوها!

 

 

 

..............................................نهاية المشهد.........................................

 

 

 

 

 

 

 

 

 

 

 

 

 

 

 

 

 

 

المشهد6:هو و هي و قبلة ضايعة

 

 

 

هي: انت وتر, و انا وتر... تعزفلي و نعزفلك... ألحان سرية ما يفهما حد غيرنا.

هو: انتي وتر و انا وتر....ونغنيوا في قاعة فرح...و نصوروا الي كتب. و نطلعوا طاق فوق دارنا يا حبي.

هي: انت وتر وانا وتر....ندخلوا في بعضنا و نخرجوا منا روح جديدة!

هو: انت وتر و انا وتر... ونجيبه جن ارقد. و يقولولنا انشاء الله فرحة عازب!

(وقتلي يقربه لبعضهم و قريب القبلة تأخذ مجراها في الحكاية, خوضة تقوم! تكبيرات و استغفارات... عيب و موش متاعنا... ريق فرانسيس... الحب بالسترة... وين بوها ؟...و صوت الباقة متع البوليس... هو و هي يضيعوا وسط المجموعة الي غمت عليهم...)

هو: الحب بحر ازرق

هي: الي يدخل يغرق

هو : والي مايوصل يهبل!

........................................نهاية المشهد...................................................

 

المشهد7:

لحظة ظهور المسدس في الحكاية, لازم طلق النار....

مانيش مسامحة...ولا عمري بش نجم نسامح.

حاولت... سكرت عينيا, تخنقت بروايح الزبل.

خيطت فمي...وذنيا كلاتهم أصوات الصياح و النباح في سبيطارات تونس... دواميس الروح.

بقى كان الهروب...و نويتها الهجة.

اما بقالي ثار... دين في رقبتي...وصية تكتبت بالعينين.

الدنيا قفل؟...أحنا المفاتح!

 

قهرتني...ذليتني من غير ما نراك و لا تعرفني...

اما وين مشيت...وين نقبل...المصيبة الي تصخطني كل مرة وراها تصحاحتك...

الموت امنية رحيمة...نحب اكثر! نحب نقتلك...نغرس فيك ظوافري و سناني! نوجعك...نوووووجعك. وشوية فيك.

 

الفلوس في السلطة... و السلطة في الفلوس...وانت الزوز...

انت الداء و بغيابك الدواء.

انت القنطرة الي بيننا و بينهم...

اذا تكسرت, الوقت يجي معانا...و الأوراق تتمشكى من الأول و جديد....

الموت ماهو كان دقة اذا غابت...الحكاية الكل مرهونة في دقة....

 

 

 

 

 

 

المشهد8: (شخصيات المشهد الأول)

شخص1: مدام موش بش نستعرفو. ماهيش بش تقوملنا قايمة.

شخص2: شنوة الي عملناه موش كيف غيرنا؟ كيف الناس الكل. هذاكة شنوة مدولنا, خدمنا بيه.

شخص3: كان عينهم يسدوا الثغرات. العبد الضعيف شنوة تحبه يعمل قدام المغريات؟ ماهو بش ينقض بسنيه و يديه!

الكل: صحيح.

شخص4: شعملنا توة؟ كان يلقاونا البقية ما عملنا شي بش يشكوا فينا!

شخص5: ويربطو الخيوط بيننا و بينهم! هي ام نذير الي شادة جول غادي حاستها فهمت.

شخص6: مسالة وقت و الحقيقة تتكشف... هي ما الها كان سبب من برشة أسباب خلاتنا اليوم نخلصوا.

(صمت)

شخص1: مزلت نحب نعيش!

شخص2: لازمني نعيش بش نصلح!

شخص3: الي عملناه قبل نجموا نعاودوه.

شخص4: وبعد المرة ...هذه صفحة بيضة.

شخص5: صفحة بيضاء من غير ملف 666. حد مايعرف علينا شي.

الكل: وقتاش نوليوا شرفة؟ وقتلي تموت كبار الحومة.

شخص6: السماح.. السماح خلاصنا... لازم يسامحونا و الا حتى كان عشنا فشلنا مرة أخرى.

الكل: سكوت! السماح في المحكمة و احنا المحكمة!

(يلبسوا الماسك و يسيبوا الغاز... أصوات الشخصيات و هي تموت....صمت.)

.............................................نهاية المشهد.....................................................................................

 

 

 

 

 

 

 

 

 

 

 

 

 

 

 

 

 

 

 

 

 

 

 

 

 

 

 

المشهد الأخير: أصل الحكاية

الشخصية: الشجرة (صوتا)

أصل الحكاية في ها الرواية...أمي .

الأرض عام 2050 عرفت و ايقنت الي الانسان ما عنده وين يوصل في أهدافه التنموية. اكبر كذابة جماعة التنمية و مشتقاتها...كل عشرة سنين يتلقاوا بش يزيدوا لرواحهم عشرة سنين اخرين.

الأرض ماعندهاش كان الانسان على كرايمها. عندها كائنات حية لا خبشت لا دبشت تلقى روحها تعاني من جرة أصحاب العقول.

و لهذا قررت تباغت الانسان الي حاسب حسابه مزال عنده الوقت. الغاز القتال الي ما فهموهش منين جاء, أصله احنا الأشجار. وظيفتنا الطبيعية عكسناها بامر من الأرض...

أنا من الأشجار القليلة الي حاولت تعطي فرصة أخيرة للإنسان. صحباتي ماتت. الي حرقوها بش يدفاوا. الي كسروها بش يبنيوا...و الي انتحرت بش ترتاح و ترتحنا من الناس الي حضنتهم... بقيت وحدي... مع خلية كارثية... خلاصهم كان ساهل ... من كثر ماهو ساهل ما راووهش...كي العادة. ديما الانسان الجواب بين عينيه و هو مايقراهش...اما المرة هذه كانت اخر مرة ليهم....

الأرض بش تبدا حياة جديدة ...من اول و جديد.....